НИТХ-ын дэргэдэх ИРГЭНИЙ ЗӨВЛӨЛИЙН 2025 ОНЫ ҮЙЛ АЖИЛЛАГААНЫ ТАЙЛАН

НИЙСЛЭЛИЙН ИРГЭДИЙН ТӨЛӨӨЛӨГЧДИЙН ХУРЛЫН ДЭРГЭДЭХ

ИРГЭНИЙ ЗӨВЛӨЛИЙН 2025 ОНЫ ҮЙЛ АЖИЛЛАГААНЫ ТАЙЛАН

Нэг: Удирдлага зохион байгуулалтын ажлын талаар

 “Цагдаагийн албаны тухай” хуулийн 62.1 дүгээр зүйлд “Нутаг дэвсгэр хариуцсан цагдаагийн байгууллагын үйл ажиллагаанд олон нийтийн хяналт тавих үүрэг бүхий 5-7 хүний бүрэлдэхүүнтэй, иргэний төлөөлөл бүхий орон тооны бус Иргэний зөвлөл аймаг, нийслэлийн иргэдийн Төлөөлөгчдийн Хурлын дэргэд байна.” гэж заасныг үндэслэн Нийслэлийн Иргэдийн төлөөлөгчдийн хурлын 2025 оны 02 дугаар сарын 26-ны өдрийн 25/38 дугаар тогтоолоор Нийслэлийн Иргэдийн хурлын дэргэд Нийслэлийн Цагдаагийн Удирдах газар, Тээврийн цагдаагийн албаны  үйл ажиллагаанд олон нийтийн хяналт тавих үүрэг бүхий Иргэний зөвлөлийг 7 хүний бүрэлдэхүүнтэй томилсон, мөн өдөр Иргэний зөвлөлийн  хуралдаанаар Т.Мөнхнасанг даргаар сонгон ажиллуулж, Зөвлөлийн ажлын өрөөг тохижуулж, техник хэрэгслийн хангалтыг хийсэн.

 “Цагдаагийн албаны тухай” хуулийн 62.1 дүгээр зүйл, Хууль зүй дотоод хэргийн сайдын 2017 оны А/133 дугаар тушаалаар баталсан “Иргэний зөвлөлийн дүрэм”-ийн хэрэгжилтийг ханган, Зөвлөлийн ээлжит болон ээлжит бус хуралдааныг 7 удаа зохион байгуулж,  хуралдаанаар жил, улиралд  хийх ажлын төлөвлөгөө, Зөвлөлөөр хэлэлцэх асуудлын төлөвлөгөөг баталж, Төлөвлөгөө,  хуваарийн  хэрэгжилтийг хангаж,  Хуульд заасан үүргийн хүрээнд, эрхээ хэрэгжүүлэн үйл ажиллагааг  зохион байгуулан, Зөвлөлийн үйл  ажиллагааны явц, үр дүн, хийсэн ажлын талаар Нийслэлийн Иргэдийн хурлын даргад танилцуулан ажилласан.

Хоёр: Үндсэн ажлын талаар

1. Иргэний зөвлөл хараат бусаар ажиллаж, Нийслэлийн Цагдаагийн Удирдах газар, Тээврийн цагдаагийн албаны үйл ажиллагаанд дэмжлэг үзүүлэх, хяналт тавих үүргээ хэрэгжүүлэн дараах ажил арга хэмжээг төлөвлөн зохион байгуулсан.

            Нийслэлийн Цагдаагийн удирдах газар, Тээврийн цагдаагийн алба, Нийслэлд ажиллаж буй Олон нийтийн цагдаагийн ажлын тайлан, дүн мэдээтэй сар бүр танилцаж, Олон нийтийн цагдаа нарын цалин урамшуулал, төсөвтэй холбоотой асуудлыг шийдвэрлүүлж ирсэн.

            Нийслэлийн Цагдаагийн Удирдах газрын 2024 оны үйл ажиллагааны жилийн эцсийн тайлангийн хурлыг зохион байгуулж, хурлаас гарсан санал шүүмжлэл, тулгамдсан асуудлыг судлан, үйл ажиллагаанд нь дэмжлэг үзүүлэх, туслах ажлыг зохион байгуулж, Нийслэлийн Цагдаагийн Удирдах газар, харьяа дүүргүүд дэх Цагдаагийн газар, хэлтсүүдийн  үйл ажиллагаатай танилцаж, хяналт хэрэгжүүлж ирсэн.             

            Цагдаагийн алба хаагчид, Олон нийтийн цагдаагаар ажиллаж байгаа иргэдийн санал, хүсэлтийг сонсож, алба хаагчдын нийгэм, эдийн засгийн баталгааг хангах, ажиллах орчин нөхцөлийг сайжруулах, гэмт хэрэг зөрчлийг шалгаж, шийдвэрлэх, урьдчилан сэргийлэх ажилд нэн шаардлагатай төсөв, хөрөнгийг шийдвэрлүүлэхтэй холбоотой  асуудлуудыг хэлэлцэж шийдвэрлэж ирсэн.

            Тээврийн цагдаагийн газрын 2024 оны үйл ажиллагааны жилийн эцсийн тайлангийн хурлыг зохион байгуулж, хурлаас гарсан санал шүүмжлэл, тулгамдсан асуудлыг судлан, үйл ажиллагаанд нь дэмжлэг үзүүлэх, туслах ажлыг зохион байгуулж, Нийслэлийн дүүргүүд дэх Замын цагдаагийн  хэлтсүүдийн  үйл ажиллагаатай танилцаж, хяналт хэрэгжүүлж ажилласан.

             Цагдаагийн алба хаагчид, Олон нийтийн цагдаагаар ажиллаж байгаа иргэдийн санал, хүсэлтийг сонсож, асуудлуудыг Зөвлөлийн хуралдаанаар хэлэлцэж, Нийслэлийн Цагдаагийн удирдах газрын болон Нийслэлд ажиллаж байгаа Олон нийтийн цагдаа нарын ажлын тайлангийн хурлыг 05 дугаар сарын 14-ний өдөр зохион байгуулж, Тайлангийн хуралд 141 олон нийтийн цагдаа оролцож, ажлын чанар, үр дүн, иргэдтэй зөв боловсон харилцах, хариуцсан хорооны нутаг дэвсгэрт эргүүлийг үр дүнтэй хийх, ажлын тайлан, дүн мэдээг бодитоор чанартай өгч байх талаар үүрэг чиглэл өгч, дэмжлэг үзүүлэн ажлыг зохион байгуулсан.

            Түүнчлэн Иргэний зөвлөлийн гүшүүд дээрх  хуралд оролцож НИТХ-ын 2025 оны 02 дугаар сарын 26-ны өдрийн "Иргэний зөвлөлийн гишүүдийг томилох" тухай 25/38 дугаар тогтоолоор томилогдсон Иргэний зөвлөлийн дарга, гишүүдийг  болон Иргэний зөвлөлөөс ажиллах ажлын төлөвлөгөө, бодлогоо танилцуулсан.

2. Иргэний зөвлөл хуульд заасан эрхийн хүрээнд дараах ажил арга хэмжээг төлөвлөн зохион байгуулж ажилласан.

            Иргэний зөвлөлийн гишүүд 2025 онд нутаг дэвсгэрийн Цагдаагийн байгууллагууд, хороо, нэгжид ажиллан иргэдтэй уулзалт, ярилцлага хийх, Олон нийтийн цагдаа нарын үйл ажиллагааг ажлын байран дээр нь танилцаж, дэмжлэг үзүүлж, хяналт тавьж ажилласан.

            Зөвлөлийн дарга, гишүүд цагдаагийн байгууллагын хагас, бүтэн  жилийн ажлын тайлан,  Нийслэлийн цагдаагийн удирдах газар, Тээврийн цагдаагийн алба, Багануур, Багахангай, Налайх дүүрэг дэх цагдаагийн хэлтсүүдийн үйл ажиллагаа, нөхцөл байдалтай танилцаж, олон нийтийн цагдаагийн орон тоо, хувцас, тусгай хэрэгслийн хангамж, төсөв, цаашид авч хэрэгжүүлэх арга хэмжээ, шаардлагатай асуудлаар уулзалт, ярилцлага зохион байгуулсан.           

            Нутаг дэвсгэрийн цагдаагийн байгууллагад гэмт хэрэг зөрчлийн талаар ирсэн гомдол, мэдээлэл хүлээн авах, бүртгэх ажилд хяналт тавьж, холбогдох мэдээлэлд дүн шинжилгээ хийж ажилласан.

            Нийслэлийн Цагдаагийн удирдах газар, Тээврийн цагдаагийн албаны цагдаагийн алба хаагч нарын Ёс зүйн дүрмийн хэрэгжилтэд дүн шинжилгээ хийж, санал дүгнэлт хүргүүлж, үр дүнг тооцож ажилласан.

            Цагдаагийн алба хаагчид, Олон нийтийн цагдаа нарын үүргээ гүйцэтгэхэд дэмжлэг үзүүлж, Иргэний зөвлөлийн гишүүд санаачлан өөрсдийн урамшууллын төсвөөс зардлыг шийдвэрлэж, гадаад хэлний бэрхшээл тулгарч байгаа  хүндрэлтэй асуудлыг шийдвэрлэх зорилгоор гадаадын иргэд, жуулчид ихээр зорчдог  Горхи, Тэрэлжийн байгалийн цогцолбор газарт үүрэг гүйцэтгэх алба хаагч нарын албаны хэрэгцээнд "Ярианы орчуулагч төхөөрөмж" 5 ширхгийг Налайх дүүргийн Цагдаагийн хэлтэст хүлээлгэн өгсөн.

            Нийслэлийн 9 дүүргийн Цагдаагийн газар, хэлтсийн үйл ажиллагаа, тайлантай танилцах, Замын цагдаа, хорооны Хэсгийн байцаагч, цагдаа, Олон нийтийн цагдаа нартай уулзаж, санал хүсэлтийг сонсох, нөхцөл байдалтай танилцах уулзалт ярилцлагууд зохион байгуулж ажилласан.

            Төрийн болон Төрийн бус байгууллагуудтай хамтран Олон нийтийн цагдаа нарын үйл ажиллагаа,  үүрэг гүйцэтгэлтэд  ажлын зураг авалт хийж, тэдний харилцаа хандлага, сэтгэл зүйн сургалтыг үе шаттайгаар зохион байгуулахад дэмжлэг үзүүлсэн.

            Хуулийн хэрэгжилтийг хангах ажлын хүрээнд “Олон нийтийн хяналт тавих, дүн шинжилгээ хийх ажлын удирдамж”-ийн дагуу Зөвлөлийн гишүүд Тээврийн цагдаагийн албаны Замын цагдаагийн газрын IV улирлын тайлантай танилцаж, олон нийтийн цагдаагийн орон тоо, хувцас, тусгай хэрэгслийн хангамж, цалин хөлс, цаашид авч хэрэгжүүлэх шаардлагатай асуудлаар уулзалт, ярилцлага зохион байгуулж, нөхцөл байдалтай танилцаж, санал, дүгнэлт өгсөн.

          Цагдаа, дотоодын цэргийн сургалтын нэгдсэн төвтэй хамтран 16 иргэнийг “Олон нийтийн цагдаа” бэлтгэх сургалтад хамрагдах үед ажил хэргийн уулзалт хийж, сургалтын үйл явцтай танилцаж, хяналт хэрэгжүүлж, хамтран ажилласан нь үр дүнтэй болсон..

Улаанбаатар цагдаагийн хүрээний даргын “Өвлийн улирлын дүрэмт хувцсанд шилжүүлэх тухай” тушаалын хэрэгжилт, "Олон нийтийн цагдаагийн ажилтны таних тэмдэг, хөдөлмөрийн аюулгүй байдлын тусгай хувцас хэрэглэх журам", "Олон нийтийн цагдаагийн таних тэмдэг, хөдөлмөрийн аюулгүй байдлын тусгай хувцасны загвар"-т заасан хувцас, хэрэглэлийг дүрмийн дагуу өмсөж хэрэглэж байгаад хяналт, шалгалт хийж, долоо хоног бүр зохион байгуулдаг жагсаалын үзлэг явуулахад, Зөвлөлийн гишүүд оролцож хяналт тавьсан.

Олон нийтийн цагдаагийн үйл ажиллагааг сурталчлах, нэр хүндийг өсгөх, олон нийтэд зөв ойлголт өгөх, хамтын ажиллагааг шинэ түвшинд хүргэх зорилгоор видео контент, шторк хийж, олон нийтийн цахим сүлжээгээр түгээн ажиллах талаар Зөвлөмж өгч, Гэмт хэрэг, зөрчил үйлдсэн эсэхийг тогтоож хуулийн дагуу шийдвэрлэхэд Олон нийтийн цагдаагийн гүйцэтгэх үүрэг, хариуцлага, тэдний аюулгүй байдлыг хангах, холбогдох хууль, журмын хэрэгжилттэй танилцаж, зөвлөгөө өгсөн.

Зам тээврийн ослоос урьдчилан сэргийлэх чиглэлээр зохион байгуулж буй  ажилтай танилцаж, Нийслэлийн Засаг даргын 2024 оны 09 дүгээр сарын 18-ны өдрийн А/1095 дугаартай “Электрон тамхи худалдан авагчдад насны хязгаар тогтоох тухай” захирамжийн хэрэгжилтийг хангуулах чиглэлээр утаат болон электрон тамхи худалдан борлуулдаг болон сургууль орчмын бүс дэх  худалдаа, үйлчилгээний цэгүүдэд хяналт шалгалт хийх ажилд Зөвлөлийн гишүүдийн төлөөлөл хамтран оролцож, олон нийтийн хяналт хэрэгжүүлсэн.  

            Мансууруулах сэтгэцэд нөлөөлөх бодисын хууль бус эргэлтэд хяналт тавих, гэмт хэрэг, зөрчлийг илрүүлж, таслан зогсоох зорилгоор Нийслэлийн Цагдаагийн удирдах газраас “Баар цэнгээний газар”-т хяналт шалгалтын ажиллагааг зохион байгуулах болон баривчлах ажиллагаанд Иргэний зөвлөлийн гишүүн О.Санчирбал хяналт тавьж ажилласан.

            Цахим болон гэрээний нөхцөлөөр халхавчлан залилан мэхлэх гэмт хэрэг, зөрчилтэй  тэмцэх,  гэмт хэргийн улмаас хохирсон иргэдийн эрх ашгийг хамгаалах ажилд дэмжлэг үзүүлэх асуудлыг судалж, Барилга хот байгуулалтын яам болон Нотариатын байгууллагатай цаашид баримтлах бодлого,  тодорхой санал солилцож, хамтран ажиллаж байна.

            Нийслэлийн цагдаагийн удирдах газрын удирдлага, нутаг дэвсгэр хариуцсан зарим  Цагдаагийн байгууллагын удирдлагуудтай уулзалт зохион байгуулж, Баривчлах байрны нөхцөл, Стандартын хэрэгжилтийг хангах, Халаасны хулгайн гэмт хэргийн нөхцөл байдал, тодорхой төрлийн гэмт хэрэг, зөрчлийн гаралтад шууд нөлөөлж буй хүчин зүйл, орчин үеийн техникийн дэвшилтэт технологийг ашиглан тодорхой төрлийн гэмт хэрэгт, зөрчилтэй тэмцэх боломж, төсөв хөрөнгийн асуудлаар хэлэлцүүлэг хийж, саналт, дүгнэлт, зөвлөмж боловсруулан  бэлтгэж байна.

             ХЗДХЯ-ны 2026 оны төсвийн хэлэлцүүлэгт энэ оны 08 дугаар сарын 12-ны өдөр  Иргэний зөвлөлийн дарга Т.Мөнхнасан оролцож, нутаг дэвсгэрийн Цагдаагийн алба хаагчдын сургалт судалгааны ажлын төсөв зардлын талаар болон холбогдох асуудлаар, танилцуулга хийж, санал өгсөн.

            Гэмт хэрэг, зөрчлийн улмаас хохирсон иргэдийн хууль ёсны эрхийг хангах чиглэлээр тодорхой төрлийн гэмт хэргийн гаралтыг бууруулах ажилд дэмжлэг үзүүлэх зорилгоор  Хуульчдын холбоотой хамтарсан судалгааны баг ажиллуулах төсөв хөрөнгийг шийдвэрлүүлж, тодорхой ажил зохион байгуулсан.

            Цагдаагийн байгууллагын үйл ажиллагаатай танилцаж, цаашид хэрхэн хамтарч ажиллах талаар санал, хүсэлтийг сонсож, алба хаагчдын нийгэм, эдийн засгийн баталгааг хангах, ажиллах орчин нөхцөлийг сайжруулах, гэмт хэрэг зөрчлийг шалгаж, шийдвэрлэх, урьдчилан сэргийлэх ажилд нэн шаардлагатай байгаа төсөв, хөрөнгийн асуудлыг  хэлэлцэж, Иргэдийн төлөөлөгчдийн хурлын даргад төсөв хөрөнгийн асуудлыг уламжлан шийдвэрлүүлж, Нийслэлийн Цагдаагийн удирдах газрын хэрэг бүртгэгч нарт 25 ширхэг компьютер, 1 ширхэг принтерийн  дэмжлэг үзүүлсэн.

            Түүнчлэн Алба хаагчдыг түрээслээд өмчлөх, орон сууцны хөнгөлөлттэй зээлд хамруулж  нийгэм, эдийн засгийн баталгааг хангах чиглэлээр дэмжлэг үзүүлэх ажлын судалгаа хийж, холбогдох алба, нэгжтэй санал солилцох ажлыг зохион байгуулж байна. 

                                Гурав: Бусад ажлын талаар

            Хүний эрхийн үндэсний комиссоос 2025 оны 06 дугаар сарын 13-ны өдөр Монгол Улсын Үндэсний номын сангийн хурлын танхимд зохион байгуулсан “Хүний эрхэд суурилсан цагдаагийн үйл ажиллагаа” сэдэвт хэлэлцүүлэгт Нийслэлийн иргэний зөвлөлийн дарга Т.Мөнхнасан болон зөвлөлийн гишүүд оролцсон.

            Хэлэлцүүлгийг Монгол Улсын Хүний эрхийн Үндэсний Комисс (ХЭҮК) зохион байгуулж, Монгол Улсын Их Хурал, Үндэсний Статистикийн хороо, Нийслэлийн Иргэдийн Төлөөлөгчдийн Хурал, Цагдаагийн ерөнхий газар, Дотоод хэргийн их сургууль, иргэний нийгмийн байгууллага, эрдэмтэн судлаачид оролцож, Цагдаагийн байгууллагын хүний эрхэд суурилсан үйл ажиллагааны өнөөгийн байдал, олон нийтийн хандлага, иргэдийн сэтгэл ханамжийн судалгаа, цагдаагийн алба хаагчийн сургалтын бодлого, хөтөлбөр зэрэг асуудлыг хэлэлцэн, цаашид хэрэгжүүлэх арга хэмжээний талаар санал, зөвлөмж боловсруулсан.

            Технологийн дэвшлийн олон давуу тал бүхий аппликэйшныг алба хаагчдын гар  утсанд суулгах ажлыг зохион байгуулснаар шинэ ажилтны сургалт, зайны сургалт, мэдээлэл түгээх, түүнчлэн албан тушаал ахих сургалтыг зайнаас өгөх хялбаршуулсан цогц шийдэл бүхий программын талаар “ГӨҮ СМАРТ ТМ” ХХК-н хамт олонтой Иргэний зөвлөлийн дарга Т.Мөнхнасан уулзалт хийж, программын  хэрэгжилтийн үр дүн, шалтгаан нөхцөлийн талаар  хэлэлцэж байгууллагын дотоод сургалтыг онлайн орчинд шилжүүлж, цаг хугацаа, зардлыг хэмнэх, сургалтын хүртээмжийг сайжруулах зорилго бүхий Динамик платформыг цагдаагийн байгууллагад нэвтрүүлэх,  ажлын зохион байгуулалт, хөгжүүлэлтийн зардлын үлдэгдэл төлбөрийн санхүүжилтийн асуудлыг судлан хамтран ажиллаж байна.

            Иргэний зөвлөл нь Монгол улсын Хүний эрхийн үндэсний комисстой хамтын ажиллагааны хэлцлийн хүрээнд Олон нийтийн хяналтын үр нөлөөг дээшлүүлж, Иргэний зөвлөлийн гишүүдийг чадавхжуулахад дэмжлэг үзүүлэх зорилгоор санал солилцох “Уулзалт-хэлэлцүүлэг”-ийг 2025 оны 10 дугаар сарын 17-ны өдөр Цахимаар зохион байгуулж, Аймаг, орон нутагт ажиллаж байгаа Иргэний зөвлөлийн гишүүд, төлөөллийг оролцуулан, Хүний эрхийн үндэсний комиссын гишүүн Б. Энхболд холбогдох сэдвээр сургалт хийсэн.

                        Дөрөв: Иргэний зөвлөлийн гишүүдэд олгосон урамшууллын талаар

            Иргэний зөвлөл нь Нийслэлийн Иргэдийн төлөөлөгчдийн хурлын 2025 оны 02 дугаар сарын 26-ны өдрийн 25/38 дугаар тогтоолоор Нийслэлийн Иргэдийн хурлын дэргэд Нийслэлийн Цагдаагийн Удирдах газар, Тээврийн цагдаагийн албаны үйл ажиллагаанд олон нийтийн хяналт тавих үүрэгтэйгээр 7 гишүүний бүрэлдэхүүнтэй томилогдон үйл ажиллагаагаа явуулж эхэлсэн. Иймд тус оны 03 дугаар сараас эхлэн Иргэний зөвлөлийн гишүүд тус бүр Хөдөлмөрийн хөлсний доод хэмжээ буюу сард 792,000 төгрөг, 2025 он дуустал зөвлөлийн гишүүдэд нийт 54,516,000 төгрөгийн урамшуулал олгогдсон байна.

                                      Тав: Ээлжит болон ээлжит бус хуралдааны талаар

            Иргэний зөвлөлийн гишүүд нь 2025 оны 02 дугаар сарын 26-н буюу томилогдсон өдрөө анхны ээлжит бус хуралдаанаа хийж зөвлөлийн даргыг тус өдөр санал хураалтаар сонгон ажиллаж эхэлсэн билээ.

№	Хуралдаанаар хэлэлцсэн асуудал	Он сар өдөр	Ирцийн мэдээлэл
1	Иргэний зөвлөлийн үйл ажиллагаа, дүрэмтэй танилцах, Иргэний зөвлөлийн даргыг сонгох	2025.02.26	Т.Мөнхнасан, О.Баярсайхан, П.Одгэрэл, О.Санчирбал, О.Хонгор, П.Одгэрэл
2	Иргэний зөвлөлийн үйл ажиллагаа, зохион байгуулж буй ажлын явцын талаар мэдээлэл солилцох	2025.05.30	Т.Мөнхнасан, О.Баярсайхан, П.Одгэрэл, О.Санчирбал, О.Хонгор, П.Одгэрэл Ч.Энхтамир
3	Иргэний зөвлөлийн үйл ажиллагаа, хэрэгжүүлж байгаа ажлын явцын талаар,	2025.08.20	Т.Мөнхнасан, О.Баярсайхан, П.Одгэрэл, О.Санчирбал, О.Хонгор, П.Одгэрэл Ч.Энхтамир
4	Иргэний зөвлөлийн үйл ажиллагааны талаарх мэдээлэл солилцох, Иргэний зөвлөлөөс хэрэгжүүлж байгаа ажлын явцын талаар, Дүүргүүдийн цагдаагийн газруудын үйл ажиллагаатай танилцах, хяналт тавих ажлыг үргэлжлүүлэх, Зөвлөлийн баталсан төлөвлөгөөний дагуу 4-р улиралд зохион байгуулах ажлын талаар ярилцах	2025.12.10	Т.Мөнхнасан, О.Баярсайхан, П.Одгэрэл, О.Санчирбал, О.Хонгор,

Тав: Санал, дүгнэлт

Иргэний зөвлөл хараат бусаар ажиллаж, Нийслэлийн Цагдаагийн Удирдах газар, Тээврийн цагдаагийн албаны үйл ажиллагаанд зохих дэмжлэг үзүүлэн, хяналт тавих үүргээ биелүүлж, хуульд заасан эрхээ хэрэгжүүлэн Хууль, дүрмийн хэрэгжилт, 2025 онд хийх ажлын төлөвлөгөө, Зөвлөлөөр хэлэлцэх асуудлын төлөвлөгөөний биелэлтийг бүрэн хангаж,  үйл ажиллагааг  үр дүнтэй зохион байгуулсан гэж дүгнэж байна.

Цагдаагийн байгууллагын үйл ажиллагааны тайлан танилцуулах, уулзалт, хэлэлцүүлэг хийх зэрэг ажил зохион байгуулахад үйл ажиллагаанд шаардлагатай төсвийн  асуудлыг шийдвэрлүүлэх саналыг Цагдаагийн байгууллагын удирдлагуудаас байнга гаргадаг, нөхцөл байдал ч ийм байгааг танилцуулж байна.

Дээрх асуудлыг шийдвэрлэн зохицуулах  эрх зүйн зохицуулалт хийж, холбогдох арга хэмжээ авах нь Иргэний зөвлөл хараат бусаар ажиллах боломжийг нэмэгдүүлэх, Хууль, дүрмийн хэрэгжилтийг хангах, нутаг дэвсгэрийн цагдаагийн байгууллагын үйл ажиллагаанд зохих дэмжлэг үзүүлэн, хяналт тавих үүргээ хэрэгжүүлэх,  ажлын үр нөлөөг дээшлүүлэхэд ач холбогдолтой гэж үзэж байна.

НИЙСЛЭЛИЙН ИРГЭДИЙН ТӨЛӨӨЛӨГЧДИЙН

                           ХУРЛЫН ДЭРГЭДЭХ ИРГЭНИЙ ЗӨВЛӨЛ